كلمات للشاعر المتميز صلاح جاهين " ناس ما تستاهل تعيش بين الناس "كلمات وزجل  تمثل واقع الحياه من تطورات غربيه وعجيبه في حياه الانسان ناس تقدر تعيش وهي اذيا الناس

****************

اللى عايش لنفسه وناسى اللى منه

عليا النعمه خيبان

واللى ميهمهوش غير المظاهر

الظاهر عليه تعبان

والطيب اللى عايش ف حاله متواضع

بأصله الطيب متصان

والخسيس الواطى

اللى ملوش عزيز ولا غالى

تلقاه دايما جعان

مهما ياكل من خيرك بينكر خيرك

ولو داقت معاك يشوف غيرك

ويقول ويحكى بالكدب عنك

ويقول ف حقك اللى مايتقال

بالقرش يغدر بيك

ماهو لو كان طمر فيه

وكان معاك انسان

كان حكى عن طيبتك

وكان رد غيبتك

مش ولعها وشعللها

ماهو أصلا مش انسان

دا تعبان بالسم بخ 

ويا ألف أخ

على قلة الأصل

واللى بينسى معروف اتعمل فيه زمان

واللى ملوش عزيز ولا غالى

واللى ملوش أمان

نصيحه منى ليك صاحب أصيل ترتاح

صاحب اللى ميحكيش عن أصله

صاحب اللى يسيب أصله يحكى عليه

ويقول فعله انه انسان

ومتسألش ندل عن أصله

أصله مادام ندل ندالته

صدقنى بسرعه عليه هتبان

واوعى تصاحب كداب

اصل حبل الكدب قصير

ومهما الوقت طال الكداب لازم هيبان

ونقى وافرز صحابك

وحاسب أوى من اللى عقله صغير

ليخليك صغير ويضحك عليك الناس

ويوديك ورا الشمس

وتروح ف خبر كان

واحفر بيرك بابره

ومتتطلبش من العويل فاس

وحط ف راسك فكره

انك واحد من الناس

فلازم تخليك طيب وتتعامل مع الناس

بكل ود وحب واحساس بالناس

أصل اللى ميراعيش الناس

مستهلش يعيش أصلا مابين الناس