وطفل لسه بيجري باكي بحرقه..

من خلف الجثث

والدم بيحاول بكل لزوجه ..

يلزق كفته في الأرض لاجل يعطله

صوت اصطدام كل الجثث في بعضها..

خلى السبع سماوات..

في لحظه مقدسه.. يتزلزلوا

ويحللوا.. دفن الجثث في بعضها

وازاي جميعا يدخلوا..

في خرم إبره ضئيل..

وكل الأرض معجونه دما

أشواك مع نباتات شيطاني..

بتشرب المنزوف بريحه مدممه

عربيه كارو محطمه ..

بتهز في اللحم الشريف المختلط

عربيه كارو ..صاحبها مش عارف إذا ..

كان ماشي صح ..

في وسط صرخات القنابل.. أو غلط

الأرض أرض الله بتصلح للصلاه..

والدفن للجسم الغريب

ودا مش غريب

بس الأماكن كلها متلغمه..

بآلاف من الأرواح..

وفوق كل القبور الصامته..

لوحه بإسم واحد.. والسحاب..

شايل في نفس الإسم حاضن في السما

كل الجثث متبسمه

وملايكة الرحمن بتقري الفاتحه..

ليل ونهار بشكل إلهي دايما متصل

عربيه كارو ..

وطفل لسه بيجري باكي وراها..

مش قادر بعقله البكر ..

يوصل للي كان واللي حصل

واللي حصل

إن الشيطان بالمنجل المجنون..

بيحصد كل لحظه في ألف روح

عصافير من الجنه الحلال ..

هربانه لسه من مدافع نار..

ولكن فين تروح

والجثه مش لاقيه الكفن

حتى اللي لسه حي..

بعد ثواني لازم يندفن

دبابير جهنم لسه مش شبعانه زن..

وسن لسيوف التعالب..والعناكب والديول

عربيه كارو اتحولت ..

مرجيحه للموءوده والموءود ..

وسكان الخيام اللي الرياح..

اخذتها للمجهول..مع بعض الجثث

عربيه كاروا..وطفل لسه بيجري..

باكي بحرقه من خلفه ،،عسس،، ..

بينشنوا لسه عليه

بس اهتزازه بيرعش المدفع في إيدهم..

نفسهم..بضيفوه على الكارو الحزين

والطفل لسه صوابع الرجلين.. نحيفه ملزقه

أعشاب بتجهز لاجل تتحول لحبل المشنقه

عصافير من الجنه الحلال..

نسيت في طعم الزقزقه..والشقشقه..

داسها القرود البرص..

والخنازير.. وسابوا الرقرقه ..

في عيون إلهي مش رخيصه ومجرمه

عربيه كارو بالجثث ..

حواليها ناس تانيه هاتتحول جثث

لكن في روحهم همهمه

بيبصوا دايما للسما..وبيسألوا

،، ليه العتاه المجرمين..

متمتعين بالحب والتأييد ..

ومن كل اللي عايزه ديب جهنم..

قبل لحظ بيوصله

ولحد إمتى هايفضلوا ..

في كل مللي يهدموا..أو يقتلوا

ويحللوا بالكدب..والتدليس..

وتزييف الحقايق كل شيء،،

عربيه كاروا على الطريق..

مع طفل لسه ما زال وراها بينتحب

وبتبكي وياه السحب

السكه كل ما يمشي ترجع بيه ورا

كل الجثث صبحت جبال قناطير..

بقايا مقنطره

والقنطره..مقفوله بالبحر اللي فايض..

من بقايا الميتين المقتولين

المظلومين

وما عادش في الأساطير ياسين

ولا طيف هرقل.. وشعر شمشون الحزين

وما عادش فيه..

غيرصوت قنابل فسفوريه مدمره..

في كل لحظات السكات

فجأه اتملى الجو الرهيب بالحدايات

فجأه اللي ماسك في لجام الحزن.. مات

وانضم للجثث اللي فوق..

عربيه كارو ..

وطفل لسه بيجري..

باكي بحرقه.. من كتر الجثث