موت القمر

نطلق بقى .. آخر رصاصه رحمه .. قبل الزحمه ..

ع الجثه اللى لسه بتترعش

نستنى إيه .. ؟ ..

والريحه فاحت ..والحصان فقد الصهيل

وماعادش جوه الشط نيل

وماعادش جوه الروح هوا

نستنى إيه .. واحنا بنتخانق سوا .. واحنا سوا

وفقدنا آخر قرش.. فوق شط الرهان

آه يا كيان اتهد .. بعد ما هد فى أعظم كيان

بقى فيه مدين .. بقى فيه مُدان ..

فى وقت واحد .. إهربى

ولا تشربى من بحرى تانى مهما كان

حتى ولو مات الحصان

حتى ولو بانت علامه فى السما

بتنادى روحنا المظلمه

فى ميدان ضلامه ..وصلصله

تتهجى روحى الزلزله .. تلقاكى صمت رهيب ..

بيدمى فى القدم

تلقاكى ترنيمة عدم ..

مدقوقه ع القلب النحاس

آه يا فولاذ العند فى الزمن الشحيح

أنا قلت ليكى زمان .. جريح

والرد جانى بصوت قابيل

نطلق بقى .. آخر رصاصه رحمه قبل الزحمه

ع الجثه اللى لسه بتترعش

نستنى إيه .. ؟ .. والريحه فاحت ..

والحصان فقد الصهيل

والجرح فاق كل الحدود

ونعود لنفس الخانة

نشهق تحت كرباج الألم والإنحناء

نسهر فى ليل الإرتخاء والثرثره

نرجع ورا .. نرجع ورا .. نرجع ورا

ولا عاد لنا قنديل عشان نسهر عليه

ولا عاد لنا مركب .. نروح الجنه فيه

ولا عاد لنا غير فين .. وليه

ولا عاد لسان ينطق بكلمة حب من أيام زمان

ولا عاد حصان للرحله قادر ع العبور

ولا فيه سطور فى الصفحه أكتبلك عليها أغنيه

ماتت خلاص الأمنيه .. ماتت طيور الذكريات

والحب مات .. والود مات .. والصبر .. مات

ومادام غرقنا فى السُكات

يبقى الفراق أحسن لنا ..

يبقى البعاد أحسن لنا

يبقى احتضار السوسنه ..

فى المشهد الأخرانى طال

يا حب يا موال نهايته مُحزنه

إدخل معانا المَحزنه .. علشان تقول آخر خبر :

( كان فيه قمر .. لما احتضر

كل النجوم همست إليه

لازم عشان ترتاح وتهدى .. تنتحر ..

فجأه انتحر

بس الحبايب كلهم .. أوقات يشوفوا

ضياه بيبكى فى السحر )