الأدب
ضلوع شقَّها خنجر 'بالعامية المصرية '
وآه يا وجع القلب
ولا حد سَمَّى عليك
ولا مسح دمع عنيك
ولافي إللي يطبطب
ولسه الروح بتتعذب
وآه يا جرح بيكبر
وضلوع شقَّها خنجر
ودم بيجري وجسد يتفَجَّر
ولحَد إمتى جوايا بيتدَمَّر
وآه يا وجع القلب
وحياة بتتعاش ف ظلم وغُلب
وعيون تاه منها النور
وكلام بيصرُخ وحروف بتثُور
وسجن ليله غميق وحاوطني بسور
وآه ولا طاقة يتسَرَّب منها شعاع
والكل غدر وسابني وباع
والظلم بجبروتُه بيقول معذور
وليه أعيش فيكِ يا دنيا إنسان مقهور
ويا حق يا مسكوت عَنُّه انطق قول
ليه الفرح جمعهم وجه لعندي وقال مشغول
وآه يا كلمة وساكنة ضلوعي
وآه يا ساكن جُوَّايا يا بحر دموعي
وآه يا عَطَش الصحرا للمَطَر
وقل لي ليه انتَ أَصَم يا حجر
يا بُكا ونواح يا ليل دَبَّاح
يا ضي فايتني ورَمَّاح
يا سنيني قوِّيني ولاتبَكِّيني
ليه بتزيدي ف هَمِّي وتقَسِّيني
يا جاي خليك أَحَن من امبارح
ليه مُصَمِّم تعَيِّشني ف دنيا المصالح
خليني أنا وقلبي نقَرَّب
وشويَّة نتصالح
كفاية تهِد فيَّ
كفاية تحُط عليَّ
أنا إللي كان الكل معايا
اتبعتروا واتفرقوا من حواليَّا
فص ملح وداب
ووداع يا قُرب الكل أغراب
وآه يا وجع القلب
يا زمن مفيهوش أحباب
لا أخ ولا صاحب واتقفل الباب
اتقفل الباب
