باحبك .. والخجل جوايا .. مش قادر ..

على صوت الهوى الهادر

على البحر اللى كان قادر ..

فى نن عنيكى .. يخطفنى

ويقطفنى .. عصير الحلم .. والثمرات

بقالى ألف عام باتهجى فى الآهات

وباتهاجى .. غصبن عنى .. عنقود العنب والتين

وباترجاكى .. يعصر قلبى تفاحك

مقرب منى مفتاحك .. يا روح القلب والتكوين

يا آخر زفره ترعشنى على الجرانين ..

وع الأسفلت .. آخر حرف يرعشنى

ضلام غيرك .. يا بدر بدورى ..

نعكشنى على الطرقات

لذلك كنت انا المعووج .. مع غيرك

وكنتى الحل للشفره

وكنتى الثوره .. كنتى الرجفه فى عروقى

شروقى بان على صدرك .. فضمينى

لآخر لحظه خلينى ..

أنام فوق رمشك اللى هاشوفه ..

لو ترقينى .. وتسمينى معشوقك

أفك فى طوقك الصوانى .. ألمس كل سنتى ..

فى أراضى المملكه الشاسعه

لا كنتى التانيه .. والتالته ..

ولا التامنه .. ولا التاسعه

ولا كنتى سوى الأولى ..

لأنك فى الضلوع ( بلقيس )

لأنك للى مات عطشان ونيس ..

من عالم الأحلام

يمام واقف على كتفى .. بيترجانى .. يسقينى

هيام فى عروقى بيصحينى من بدرى

أيا بدرى اللى بان الضهر قبل القلب ما يتعب

تعبت فى مشوارين الليل ..

ولا غيرك هاينقذنى

وها يعززنى من .. تانى .. وانا المنسى

وانا المقتول .. وانا الجانى .. وانا الناسى

وانا اللى هانام على صدرك .. حمام بُنى

ساعات أشعر .. بأنك واحه من سِنى

ويوم أشعر .. بأنك بنتى .. إنك أمى ..

إنك شاطئ اللى رموه على الساحل

شبابى كان .. هناك .. راحل

لحد ما جيتى .. رجعتينى لطفولتى

ورجعتينى للأشعار .. وكنتى ميدانى وبطولتى

وكنتى الواقفه تستنينى بعد رجوعى من عكه

جريح فى شوارع الأموات ..

ياخدنى سكات .. لألف سكات

لألف مكان بيسفحنى .. وبيطوحنى فى السموات

باحبك زلزلات السكه لو تحدفنى من فوقك

بابحك ذبذبات الخطوه لو تلمح فى يوم شوقك

يا مهره حب مطلوقه على ورقى

يدوقك برقى .. ويضمك

أنا جدك .. أنا خالك .. أنا عمك

أنا الأب الى شالك من زمان حدوته ربانى

أنا الشِعر اللى نفسه فى يوم يكون أمك

واشِمك بين زحام الزحمه حدوته

وادوقك توته .. واعصر فيكى من بره ومن جوه

تاخدنى ( القوه ) ليكى .. أشيل عصافيرك

حريرك من بعيد يا حبيبتى يلمسنى

ويحرسنى وانا راجع

مواجع شايله فى مواجع .. بتضنينى

تعالى يا أمى شمينى ..

( كريز ) مرجوف على فرعك

ولد .. نفسه يدوق نبعك

ويتحنى بلون شعرك .. وفستانك

تعالى وافتحى بستانك المقفول لناس تانيه

تعالى .. نفسى اعيش العمر بالثانيه ..

فى ضل عنيكى .. أقطف توته فوق صوتك

ولا يحيينى إلا عصير حواديتك

يا صوت لكمنجه قمحيه بتشجينى

وتخطفنى من الصحبه

يا صحبة ورد ..

إمتى رغيفك الخمران يشبعنى

ولا يرجعنى بالورق القديم والصمت والدوران

أنا جوايا ألف قصيده كالبركان وباندهلك

أقول الله على صعبك

واقول الله على سهلك

واقول خليكى ماشيه فى حضنى ..

أه إمشى على مهلك

لعل الرب يدينى كمان لحظه ..

عشان أخدك لأوراقى

ما زال العمر فيه باقى ؟ ..

يا ريت أقدر أكون ليكى

تاخدنى عنيكى داخل منطقه فايره .. تفورنى

بدون ما حد يشعر بالهوى المطلوق .. تسهرنى

تطهرنى من الظلمات .. من السكه

يا طعم الضحكه .. لو ملهوفه ع الملهوف

أنا ياحبيبتى خوف الخوف .. من المجهول

وانا المسئول .. عن اللى كان

لأنى كنت فى الرحله .. بلا بوصله ولا شمعه

كلام أخرس .. يشد الدمعه من صوتى

لحد ما جيتى لىّ تخضرى غيطى

وتستنينى قبل الشمس ما تدمع على الشبابيك

يا ديك قايد على سطوحى

سمعتك وانتى بتبوحى .. عشانى .. فارتجف دمى

أنا عطشان .. ياريت تروينى يا أمى

وتستنينى قبل الليل ..

ما يرشق سيفه فى حشايا

يا آيه .. جوه روح روحى ..

يا حسن الحسن .. والتراتيل

يا قنديل الأمل والزهر والحنه

عيونك فدانين من جنه بتنادى

رموشك نخلتين لبلادى ترسمهم

وصدرك شلالين للدنيا تقسمهم

وبرضه يفيض عشانى شلالين واكتر

يا تل الحب والبرقوق .. يا نهر الود والزعتر

يا ريت ياحبيبتى فوق جبلك .. أنام .. واصحى ..

وأتجمع .. وأتبعتر

وأفطر من شفايفك خوخه تشبعنى

وبعد ثوانى تنده لىّ .. وتجوعنى جوع أبدى

يا نسمه فى شهدى .. بتصبرنى لو أشكى

عروسة البحر إنتى لو فى يوم أحكى

خدودى لو فى ليل أبكى .. وتكعيبتى

حبيبتى .. لو يضيع الحب فى الأكوان

يا شال مبدور على كتفى

ياريتك تدفى جوه قميصى ..

ترسى ف يوم على شطى

ياريتك تحفضى ( خَطى ) ..

تكونى معايا فى المشوار

تكونى النور معايا .. بس تبقى النار على غيرى

ولا يحضن فى طيرك يوم .. سوا طيرى

تطيرى معايا داخل مستطيل مرسوم ..

على قدك .. وقدى .. مقاسنا بالسنتى

شهيق أخده .. زفير تاخديه

وقلبك .. هو قلبى .. كل شئ حوالينا بيدفيه

ويوهبنا القدر خطوه تكون لينا

نغطى عنينا م العاصفه .. يا ضل الله

أنا شراع الهوى اللى تاه .. بدون ما يتوه

ولا يندم على اللى راح

لأنك جيتى فوق سكة جراح قلبى مع غيرك

لأنك فى نزول الدمع .. كنت دخول لبوابتى

ولا حسيت فى يوم أبدا .. بلفظ ( حبيبتى )

غير وياكى .. سامحينى

إذا شوفـتى على هدومى شبح طينى

إذا شفتينى من جوه قصور مايله

ما زلت فى صرخة التكوين ..

بدارى جرحى فى حسنك

فسيبى إيديه ترعش فى ورق غصنك

وهاتى الفجر للسهران يغنيكى

أغانى كلها جديده .. معانى كلها جديده

أمانى كلها جديده

ولو حسيتى بالملل اللى مش ممكن هايدخلنى

قوليلى لاجل أهديكى الحياه يا حبيبتى تنهيده

أنا نفسى أكون فى عنيكى..

بدء قصيده تبقى جديده يا جديده

يا جمله مفيده .. فى دنيا .. حروفها كلها معاده

بقولك يا أمل للقلب ..

إنـتى السيده الأولى .. على الساده