صلو على النبي

قالت عائشه: " يا أبى رأيت فى المنام ثلاث أقمار سقطوا فى حجرتى

نبدأ حلقتنا بقصه جميله .. قبل خلافة سيدنا أبو بكر  كان فى ست عجوزه وبنتها صغيره .. كان بيروح لهم سيدنا أبو بكر يحلب لهم الشاه ويسقى الست العجوزه والبنت .. ويروق لهم البيت ويمشى .. فلما تولى أبو بكر الخلافه قالت البنت لأمها: من اليوم لن ياتى لنا ابو بكر ليحلب الشاه .. خلاص بقى الخليفه ..

لكن المفاجأه أن سيدنا أبو بكر فضل يجي لهم ويحلب لهم الشاه وهو خليفة للمسلمين ..

النبى عليه الصلاة والسلام قال: أرحم أمتى بأمتى أبو بكر وأشدهم فى أمر الله عمر وأشدهم حياء عثمان ..

أقول لكم حاجه جميله .. عارفين تقسيمة الخلفاء مناسبه جدا للتاريخ الإسلامى .. يعنى بعد وفاة النبى عليه الصلاة والسلام هتيجى ناس ترتد وتقول النبى كذاب .. فلازم كان يبقى الخليفه هو  أبو بكر "الصديق".. تخيلوا حد يجى يقول النبى كذاب والخليفه هو أبو بكر اللى كان دايما يقول للناس: إن كان النبى قال ذلك فقد صدق .. وفعلا أبو بكر بمنتهى القوه حيحارب المرتدين ..

ويموت سيدنا أبو بكر فيكون الناس خلاص بقوا محتاجين خليفه جامد يمسك زمام الامور فيجى سيدنا عمر ويبقى خليفه لمدة ١٠ سنين ..

بعد ١٠ سنين الناس وقفت على رجلها ومحتاجين خليفه هادى وحنين فيجى عثمان بن عفان .. وفى أواخر عصر عثمان تبدأ الفتن .. فعايزين حد حكيم وجامد فى نفس الوقت فيجى علي بن أبى طالب .. شوفتوا ازاى تقسيمة الخلفاء !! أصل ربنا اللى بيختار سبحانه وتعالى ..

ندخل على خلافه أبو بكر .. بنت سيدنا أبو بكر " السيده عائشه" نامت فشافت رؤيه وحكت لأبوها عليها .. قالت : يا أبى رأيت كأن ثلاث أقمار سقطوا فى حجرتى ..

فلما مات النبى عليه الصلاة والسلام وأندفن فى حجرة عائشه .. فقال أبو بكر: يا عائشه هذا خير  أقمارك وهو أحدها ( يعنى ده واحد من الأقمار الثلاثة ) .. وفعلا النبى عليه الصلاة والسلام وسيدنا أبو بكر وسيدنا عمر دفنوا بجوار بعض فى حجرة السيدة عائشه رضى الله عنها وأرضاها  فكان أبو بكر ثانى أقمارها وعمر ثالث أقمارها.

نكمل لاحقا إن شاء الله