الأدب
مَاحَبِّيتهاش 'بالعامية المصرية '
ماحبيتهاش...
صحيح كانت حلوة وطيِّبة
دمَّها خفيف وليَّ قُريِّبَة
صحيح كانت شايلاني
وحسِّيت بيها شارياني
ومكانتش بتتحمل يتجرح شُرياني
أو إني أتعب أو أحزن وكانت أماني
حتى كمان كانت ف حياتي أغاني
كانت دفا كانت ونس
كانت شروق الشمس
كانت حاضر وأمس
لكن مش مستقبل
مش عايز ضمير يفزعني
ولا واحدة على كلامي تبَصَّمني
وبكل عيوبي لازم تقبل
كدبي ولفِّي ودوراني
وجناني وأما يقوم بركاني
الحقيقة كانت جمل ...
كانت جبل....
وفيها من وداعة الحَمَل....
ماتعرفش تكون لئيمة
صادقة ف شعورها وأفعالها
وعاملة لنفسها حضور وقيمة
صحيح يبان شكلي جد
ولما أشوفها بتضحك... أنَكٍّد عليها وأصُد
لكن أنا عايز شوية دلع وهلس
ومالُه لما أجرَّب صنف جديد
مش كله حلو...شوية حادق بيفيد
مغامرة ...عايز مغامرة
ومتقولوش خُنت وعملت مؤامرة
واحدة لعبِيَّة تشدني...
أجدد بيها شبابي....
وأخلِّيها تحبِّني.....
ترضي غروري....
وأنعِش شعوري....
ولو مش عاجبها تسكت بفلوسي
وأقولها خُدي إديَّا بوسي
متقولش كرامة وعزة نفس
ولا عيب وحرام
وزن ووجع دماغ وكلام
لا تفكرني بدروس العيال
ولا دكاتره ومسؤولية
وتعيشلي الخيال
ولا تعيد وتزيد
وتعملِّي رابعة العدوية
واسطوانة مشروخة ومصَدِّيَّة
وعلى سجادة الصلا قاعدة ليلاتي
هات يا تواشيح وابتهال
شوية فرفشة على نعنشة
ناكل لقمة سوا وقاعدة حلوة
متوجعش دماغي بطلبات
ولا تقول لي عليك وهات
هو الراجل عايز ايه
غير واحدة تحت رجليه
شوية دلع على حبة حنان
وتاخد عنيَّا....
وأديها كل اللي ليَّ....
بس بمزاجي....
هتشوفني هشوفها
هتقرفني هسيبها
دي وجهة نظري...
إيه أنا فيه غلطان؟
طب والله مستحملها وغلبان
تاخد عيالها وتسيبني
كفاية عليها وعليهم نفد صبري
وأخدوا اللي فات من عمري
شخصيتها قوية وما تناسبني
حقي أعيش حياتي...
وإيه المشكلة؟
أعيد المراهقة براحتي
متقولوش حرام
ولا عايز اسمع ضمير
ولا من حد لوم واتهام
خلِّيها عاملة فيها غفير
الشرع حلل أربعة....
لكن هتقولي كرامتي
وانا مليش خُلق لكدا
ولا أسمع قولة عيب من ده ودا
والعيال هي ترَبِّيهُم
ماتزهقنيش بحكاويها وحكاويهم
تقوم بدورها إللي بتحبُّه وتخاويهم
تعالج وتطبطب وتدوايهُم
وانا أعيشلي يومين حلوين
أهلها يشيلوها وعيالها مُرغمين
أروح أناملي شويتين
واكلم الحلوة ام غمازتين
