الأدب
مفعُولاٌ به مصلوب
مفعُولاٌ به مصلوب
ع الهامش مش محسوب
لكن في الجد يكون
أول واحد مطلوب..
#مفعولا_به_مصلوب
وعلامة صلبه الكسرة
واقف بيموت م الحسرة
صعبان علي نفسه كرامته
علشان الروح مُنكسرَه..
بيحب بلاده وجيشهُ
مجرور علي لقمة عيشهُ
لكن في كلاب فاسدين
غاويين ديما تنهيشهُ..
تهميشهُ ده فعل مباح
ضربينهُ بالف سلاح
ماشي ف عتمة أيامه
وشعاره الصبر كفاح..
مغصوب مغلوب علي أمره
ومسلم ديما أمره
وبيحلم باللىِ يصون
أو ينظر مرة ف أمره..
مربوط في الساقية كاتور
والعمر طابور في طابور
بالعافية أهو مقضيها
مستني يجيله الدور..
أحلامه يعيش مستور
ويموت برضك مستور
مش طالب مال ولاجاه
ولا حتي يكون ف قصور..
مفعول لكن مُتَفاعل
وف لحظة هايصبح فاعل
وف وش الظالم يضرب
ويكون ولا أقوي مفاعل..
مفعول ومضاف للماضي
مستني العدل يا قاضي
عدل قوانين العيشة
قبل ما ترحل للهادي..
مفعولا به مظلوم
والحالة دي صعب تدوم
بكرة الترتيب يتغير
والامر يكون محسوم..
والفاعل لو مجزوم
ف كلامنا مالوهش لزوم
فيه رب خبير وعليم
هو الحي القيوم..
يمهل ولايهمل يوم
ف الظلم ده صعب يدوم
في حساب للكل هيخلص
م الظالم للمظلوم..
#سامح_هريدي
#شاعر_الغلابة
