حطولي في الصوره فرس..

تحتي..وفضلوا يلبسوني هدوم جديده..

ويعدلوا لي القميص

فخرجت م الألبوم عريس..

لكن في قلب الروح جروح..

وسهاد مدمر..وانفصام

نصحوني لو هانطق.. أتهته في الكلام

فهربت للساحل..

وكاحل رجلي وارم م العصايه المجرمه

ما لقيتشي نجمه تونس القلب الحزين..

لحظه صعوده للسما

ولا نابني غير كسر العمود الفقري..

ليلة وقعتي من ع الفرس

القط في الصوره اللي كانت جنبي..

حاضن في الجرس

و أنا اللي ماشي بدون حرس..

هايم في أرض الله بدون رعشة غطا

ولا صيف معايا ولا شتا

ولا حاجه ثانيه غير كلاب..

ماشيه ورايا من زمن

بيحاولوا تاني يكرهوني في الوطن

وانا قلبي دقاته الحزينه من دفاه

ومن البقايا الفضله ليا من دقيق معجون غلط

قلب الجميع اصبح زلط

وتلال من الأسمنت لزقه في الرئه

الفجر ناقص شقشقه

والحبل ناقص مشنقه

واللي وقف فوق الشجر ..

م الفجر ناقص زقزقه

وانا وانتي لسه محنطين في الباترينات

فوقنا صفوف غربان معاهم حدايات

والقات ما زال ممضوغ من الكرسي القزاز

القطه ويا ولادها ليها ٩ بزاز

والسقف فوقنا نزلوه

قلنا بحسره يا ناس ياهوه

شدوه لأن الخنقه واصله لعضو حاسس بالشقا

والعضم كله دقدقه.. مع طقطقه

و وجع في كل جسدنا من طول السهاد

قولتلها إوعي تأجلي أبدا ميلاد

ولا تنطقي تاني في يوم ..

غير لما إبنك يختاروه علشان يفوز

يا ام القمر واللوز.. وطيب الجوز..

في خدك منذ عهد الحزن والبوسه النحاس

أو منذ عهد القرده والنسناس.. وعهد النخاسين

قولتلها قولي لكل أنجاس البشر

الأب مين والأم فين

آه يا قلل مترصصين.. من عهد خوفو و أفلاطون

الباشا اغا شافك أصيب بالتوهه من حالة جنون

ولا ليا عون غيرك..

لأن الصوره كانت من زمان..

متعلقه من مده بالمقلوب ومسمارها انعوج

القلب في دقه الجريح ليكي عرج

وخرج يدور تاني عن برواز سليم

ورجع بتوب لكن قديم

فرسم على صورتك سياج..

مع تاج إلهي من دهب

كل اللي كان وياكي في الألبوم ذهب

والحرف م الصمت اتنهب

وسحابه غطت ع السحب

وصرخت رغم الجوع..

في ليلة دخلتك عندي ..وتوبك سندسي

الله يا ست الكل يا زينه الملاح

هانطقها في بير الجراح..

،، سبحانه هو اللي وهب،،