تعِبت كتير جُوَّايا

كل ما خلاص أسَلِّم

وأقول كفاية هستسلم

أرجع أقوم من تاني

ألملِم دمعي وأطَبَّق أحزاني

وأطوي صفحات أيامي

وأوهم نفسي بِبُكرا جديد

وأرسم وأخطط مواعيد

وألبس وأعمل عيد

وأعيش بالأمل وأحلم حلم خيالي

وأكفكف بُكا قلبي

وأتمنى لو ثواني أعيش والبال خالي

وعن ظهري أرمي حمولي

وتضحك ياسمينة داري

وأفرد طولي وأكمل مشواري

تِعبت وإيدِى بتوعِد هتشيل تاني

وهعزف ف أرضي الأماني

مش هأهرب وأسجن أحلامي

ولا عمري لحقي هنسى

لكني اتحوِّلت لكائن اتعلِّم يقسى

شاف الخوف بعيونه وحاربُه

داق الظلم بطعمُه ولونُه

صلَب عودُه لملِم خَشبُه

عِرِف ازاي يصنع قاربُه

سبَح لِشَط مجهول

ضد تيار الغول

رفع شراعه والصوت يعلا

بُكرا طلعتُه أحلى

مد القمر أنوارُه

فَتح أبواب أسوارُه

ساعدُه ودَفن أسرارُه

وَعَدُه يمحي ضلمتُه

ومش هيسيبُه لوحدتُه

هيدَفِّي ضلوعُه ويصاحبُه بغُربِتُه

صحيح الليل ساكن ف كيانُه

لكن نور القمر حكالُه

دي سُنة الكون

ومفيش ليل بيدوم

والأمل هيشُق نهارُه

ويطبطب على قلوب عطشانة

ويمسح دموع الثكالى

ويواسي أرواح الأبريا الحزانى

رغم الألم رغم تراب الهدم

رغم الكِبر ونزف الدم

رغم الحصار وأمهات بتنهار

وأنين أطفال أطهار

رغم الجوع وحبس الصوت

وجرم وخراب الذمم

وتحدي لطمس هويَّة

وروح حُرَّة أبيَّة

وطيور حاملة حجارة

وحزن ومرفأ اتعدم

وفجأة اختفى الضمير وسط الغيام

وأموات كفنها ركام

وقالوا السبب طبيعة غضبانة

ودا رد لفعلك يا انسان

وإشارة ليك يا غفلان

لا تنصدم لا تنصدم

الصيحة وقيامة بتقوم وجايحة

وأوبئة جديدة آخر صيحة

دا مش خداع ورص كلام

ولا حروف بتسطَّر أيام

دي حرب ويَّا الشيطان

ويصرخ البشر فين الدفا

فين الوفا الكل بردان

ضاعت جيرة الأمان

وبنوا قبور النسيان

ونصبوا عمدان الخيام

وإليك اللجوء يا رحمن

وأم رموش طويلة

لا لاقية كحل ولا لها حيلة

والصغار طالبين ألبان

وغطا يستر الأبدان

وضحوا بأرواحهم الولدان

لكن ارجع وأقول

لولا خراب العقول

وطناش وكله هيزول

واللي استثمر في الشرور

كان كل دا ما جرى

ولا الجفون غطَّاها الكرى

بكرا الفجر يشُق بنور

لكن الجشع بالمرصاد

ولابد من وقفة وقرار

اتوحدوا أو وحِّدوا

بقيتوا صفوف وفرق

وخيانة عايمة ف مية أنهار

ضعيف ياللي حيلتك السكوت

وعامل غلبان وسارح ف الملكوت

ووقت الجد تهرب فرار

وحجتك الخوف لا يتغير لون البحار

بسواد القلوب والدم ف عز النهار

عايش هادي ولا كإن البيت بينهار

فين النخوة فين العزة

واضح إنه موسم خريف الأشجار

وارجع وأقول

الربيع مسيره هييجي

وتطرح بساتين عيدي

ويتهد المعبد ع الأشرار

إغاثة إغاثة

بيقولوا واقفة هناك الجساسة

بتوزع أكل وبالقلب رصاصة

فين يا ولاد المِنتظر

والله خلاص القلب انفطر

غاز وشعاع وإشعاع

صدع ومناخ بيحتضر

كورة ولا سطح ؟

حقيقة ولا خيال وأڤاتار ؟

طلعوا القمر ولا كان فيلم وأسحار ؟

هو في صحيح تجهيز للمليار؟

هو ربنا وحده ف بطشتُه جبار

فوقوا يا عبيد ويا عباد القهار

والله ما خلوا لا بيولوچي ولا نووي ودمار

كتروا الضحايا وف جنة الخُلد يا أبرار